文本歌词

陈小汉、钟丽容 - 游龙戏凤
生：
花飘雨 柳飞绵
锦绣江南春色染
莺啼鸟唱
又一个欢乐太平年
哩个惜花人
为把名花选
二十四桥曾踏遍
当日小溪流水
一角酒帘
一角酒帘
倩影依稀犹在我心头浮现
龙凤店 唔
冇错 係哩间喇
喂 伙记 伙记呀
旦：
嚟啦
生：
喂 伙记呀
旦：
嚟啦
嚟啦 先生你坐下先
生：
嚟啦 娇声似蜜咁甜
嚟啦 唉我心绪咁乱
旦：
嚟啦 呼叫得惹人厌呀
先生
我喺里边正忙着
招呼来迟
你 你唔好见怪呀
生：
乜说话
上次哩间店中
好似你有个拍档㗎噃
旦：
嗰个係我哥哥
今日入城买味料呀
生：
哥哥啊 乜嘢哥哥呀
旦：
哼 哥哥就哥哥
仲有乜嘢哥哥呀
生：
哥哥有好多种嗰噃
嗱
比如亲哥哥 表哥哥
契哥哥 情哥哥 爱哥哥
旦：
喂 先生你係嚟
生：
我係嚟饮酒呀
旦：
好 酒都有好多种嗰噃
嗱
比如甜酒 酸酒 辣酒
仲有畀人赶走
知机者就自己走
生：
哈 好好好
咁你答咗我先我就走
旦：
咁呀 好啦
你听住咯噃
嗰个係我同爹同娘嘅亲哥哥
生：
哎吔
咁真係赶我都唔走咯
真係天公助我
有此巧合机缘
更喜店内冇他人
旦：
你真係心肝黑过墨砚
我店中冇生意
你好高兴咩
生：
咪闹住先
我愿补偿你嘅损失
畀多几呀倍 金钱
旦：
唔使喇
本店价实货真
童叟无欺
你愿啫 我都唔愿
喂 饮酒就快啲点菜啦
生：
好好好
咁你就介绍啲招牌菜
最紧要合心水
合口味
旦：
好呀
嗱 咁你听住
苋菜 芥菜 白菜 芹菜
生：
统统唔啱
我要 我要花
旦：
花？都有啫
嗱
芥兰花 椰菜花 韭菜花
还有凶神恶煞嘅霸王花
生：
哇 统统都唔啱
我要哩一朵
娇娇俏的半睡蓮
幽谷涧边
暗香淡荡亭亭独秀
凤骨似天然
清波喷泉
杨氏女初叨君宠眷
脱尽凡胎俗物染
腰肢细细肌肤嫩嫩
旦：
咪乱嚟放肆噃
要避下疑嫌
生：
你貌美娟娟
嗔嗔怯怯在面前
动人怜
旦：
我话你成身讨人厌
生：
嬲下仲靓仲靓
嬲多三几遍
旦：
睇你份人
面皮都几厚嗰噃
生：
喺美人面前
面皮厚啲係唔紧要嘅
旦：
睇你一表人才
英年俊秀
風度翩翩
我听你谈吐清新
虽是艳语游词
犹带深深书卷
却为何
举动轻浮浅薄
无聊无赖 无德无礼
你样样学足齐全
生：
鬼叫你咁风骚
鬼叫你咁销魂
使我重临你哩间龙凤店
我不是采花蜂
只愿为裙边蝶
为你春水无波
才有东风自许
拨动你一线心絃
乖乖的坐坐下嚟
旦：
你就想呀
既称我出水莲花
便知我出污泥而不染㗎
生：
喂
我非是要你作邪行
只共你谈诗酒
旦：
可惜我未读过圣人篇
生：
又好
不谈诗书经史
可说村社时闻
旦：
须知店中嘅规矩
都不能乱㗎
生：
哦
咁你店中有乜嘢规矩呀
旦：
店中嘅规矩
係伙记唔可以与客人陪坐嘅
生：
呵
天下嘅规矩都係由我嚟定
我从未听过有哩条嗰噃
旦：
嚇
我都未曾落蒜头
你又未曾点菜
点解你口气咁大㗎
生：
哼
我係真话 实话
旦：
废话
就算天下规矩由你定
哩间店中嘅规矩
係由我定啊
生：
哦
咁你唧係闩埋门做皇帝啫
旦：
我就係要闩埋门做皇帝
生：
哦
唔怪得攞哩个店名啦
哈 只不过
你係做唔到皇帝
最多係做皇妃嘅唧
旦：
咁你就错喇
我哋攞哩个店名
就唔係咁嘅意思㗎
生：
咁係乜嘢意思啊
旦：
咁你就听住喇
我哥哥叫李龙
妹妹我叫李凤
兄妹开间龙凤店
个名都算取得好自然
生：
哦
原来你叫做凤姐呀
哦 个名真係甜噃
真係甜呀甜甜
睇真你个样咯更仲甜
可惜店个名欠咗自然
凤与龙乱配真係有损
应该孖我结凤鸾
今日龙凤店
摆下龙凤宴
我哋两家至係龙凤眷噃
配得好啱线
旦：
躝开呀
水缸照下你颜和面
好心点菜你就快啲啦
难道要等等到你埋年
生：
任你龙庖鳳翅
一概不要
只要凤姐将心献
旦：
喂 居心不端
把口你更加贱
莫看穷村酒家女
最憎你巧语乱作轻佻言
生：
正適奇逢万里缘
牵一线
我係当今帝主我係龙
旦：
係龙就快升天
生：
无须疑心行骗
应该笑面拜谢听封受皇恩
宫花簪鬓伴御前
旦：
莫讲你胡言乱道喇
就算畀个皇妃我
我都唔愿做呀
生：
皇妃都唔做呀
喂
伴住个多情皇帝
风流快活富贵荣华噃
旦：
当日杨贵妃喺马嵬兵变
白绫夺命 黄土埋冤
仲有个丽华深得
陈主宠眷
沉身井底 抱恨绵绵
生：
你好似读过好多书咁噃
旦：
唓
盲佬唱木鱼书听番嚟㗎嘛
生：
咁你就冇听齐全
嗰个係无道昏君天下
至令到昆山玉石化狼烟
我係有道明君
深察民冷暖
百姓丰衣足食
共享太平呀年
旦：
哎吔 睇你
好似当成自己係皇帝咁噃
生：
傻女 我係真皇帝嚟㗎
爲爱凤姐你纯真
今日屈驾你间龙凤店
睇我身上九龙玉印噃
正是皇家世代传
嗱 你睇下
旦：
都唔知真定假嘅啫
生：
边度假呀
仲有 仲有
旦：
嚸呀又
生：
里边哩件滚龙袍
云海龙翔光闪闪
旦：
唓
睇大戏都见过啦
生：
乜睇大戏都见过呀
仲有 嚟 凤姐
旦：
仲有乜嘢呀又
生：
你睇 睇呀
远望四周花树底
不尽旗角与刀尖
睇下
旦：
哎吔
乜 乜 乜多人㗎
生：
咁多人呀
都係护驾御林军
保住孤皇无惊险
为怕吓亲我哋凤姐
不许走近店前
你睇孤皇对你几体贴
几爱惜你呀
旦：
哎吔
如今点算
果真身前係至尊
我悔言失检点
心惊颤 步难移
浑身汗雨点
生：
哼 你衰啦
你得罪咗皇帝啊
旦：
哎吔
人 人哋咁惊
你 你仲嚟吓我㗎
生：
唔使惊 凤姐
我头先同你讲下笑啫
皇帝都係人嚟㗎啫
一样父养娘生
一样有情有义
一样识爱识怜
你身列上林花
一样雨露均承
一样春光同沾
我嘅好凤姐
旦：
只怕庸姿蒲柳
寒微身世
难作桐枝凤
不堪配彩鸾
更怕处深宫
身贵是非多
我哩副直心肠
不会避横刀暗箭
生：
正喜你身出寒微
深知民间疾苦
能助我除苛政解民冤
你就跪在我跟前
听皇封典
旦：
真係半羞半喜
不知怎样开言
生：
凤姐
你唔使讲咁多喇嗄
你就跪喺哩度得喇
旦：
点唧 跪喺度呀
生：
係 你跪喺哩度唔好郁
孤王封你東阁皇妃
恩承御殿
旦：
咁 咁你封我咁我应该点唧
生：
你叩头 叩头 冇错
你话
你话谢主龙恩咁话
旦：
咁我叩头咯哦
谢主龙恩
生：
哈…平身 摆驾
一片月色照御銮
金戈铁戟越觉光辉闪
旦：
山欢欢 水笑笑
风淡淡 花妍妍
满天尽染霞彩
生：
春意融融
似贺我偿美愿
旦：
感领万岁恩深重
令人春山轻笑展
箫笙耳畔奏
妙韵心里现
生：
香车载得新宠眷
合：
今宵喜见月团圆
今宵喜见月团圆