文本歌词

母语 - 德吉老爷/索罗
词：罗松/桑丹
曲：德吉老爷
ལྷ་ཡི་ཐོག་མ་ཕྱག་ན་པད་དཀར་ཡིན།
བོད་རྗེ་ཐོག་མ་གཉའ་ཁྲི་བཙན་པོ་ཡིན།
མཁར་གྱི་ཐོག་མ་ཡུམ་བུ་བླ་མཁར་ཡིན།
དགོན་གྱི་ཐོག་མ་བསམ་ཡས་གཙུག་ལག་ཁང་།
ལོ་ཙཱའི་ཐོག་མ་ཐོན་མི་སམ་བྷོ་ཊ།
ཁོང་གིས་རྒྱ་གར་གྱི་ཡི་གེར་དཔེ་བླངས་ནས་གསལ་བྱེད་ཉེར་བཞི་གཏན་ལ་ཕབ།
བོད་སྐད་གདངས་ཀྱི་དགོས་པ་བཞིན།
སྟོད་དུ་ཅ་ཆ་ཇ་གསུམ་དང་།སྨད་དུ་ཞ་ཟ་འ་གསུམ་བཅས།
གསར་དུ་བསྣན་པའི་ཡི་གེ་དྲུག།དེ་ལྟར་གསལ་བྱེད་སུམ་ཅུ་སྟེ།
ཀ་ཁ་ག་ང་།ཅ་ཆ་ཇ་ཉ།ཏ་ཐ་ད་ན།པ་ཕ་བ་མ།ཙ་ཚ་ཛ་ཝ།ཞ་ཟ་འ་ཡ།ར་ལ་ཤ་ས།ཧ་ཨ་བཅས།
དབྱངས་བཞི་ནི།ཨི་ཨུ་ཨེ་ཨོ།
རྗེས་འཇུག་བཅུ་ནི་གང་ཡིནག་ང་ད་ན་བ་མ་འ།ར་ལ་ས་ནི་རྗེས་འཇུག་བཅུ།
སྔོན་འཇུག་ལྔ་ནི།ག་ད་བ་མ་འ་སྔོན་འཇུག།
རིག་གནས་ཆེ་བ་ལྔ་དང་ཆུང་བ་ལྔ།བཟོ་དང་གསོ་བ་སྒྲ་དང་ཚད་མ་དང་།
ནང་དོན་རིག་པ་འདི་དག་ཆེ་བ་ལྔ། སྐར་རྩིས་དང་ནི་སྙན་ངག་མངོན་བརྗོད་དང་།
སྡེབ་སྦྱོར་ཟློས་གར་སོགས་ནི་ཆུང་བ་ལྔ།
ལགས་སོ།
༢༼ཡ་སློབ་ཕྲུག་ལག།༽
ཁྱོད་ཀྱི་ཞལ་རས་དཀར་ཟླ་བ་ལ།བྱམས་བརྩེ་སྟོང་གི་འཛུམ་མདངས་འཕྲོ་འདུག
ཐུགས་རྒྱུད་རྒྱ་དར་དཀར་པོ་ལ།ཤེས་རིག་སྟོང་གི་འོད་སྣོང་འཕྲོ་འདུག
སྐུ་གཟུགས་ཙ་རིའི་སྙིག་མ་ལ།གདོང་དམར་བུ་ཡི་ཁྱད་ཆོས་ལྡན་འདུག
ཁྱོད་ནི།
བོད་ཁ་བའི་ཁྲ་ཆུང་མིག་རེད།དྲིན་ཕ་མའི་དམར་ཆུང་སེམས་རེད།
དགེན་ང་ཡི་བརྩེ་བའི་སྙིང་ཡིན་པ་མ་ཟད།ཁྱོད་ནི་རྒྱལ་ཁབ་ཀྱི་རེ་བ།
མི་རིགས་ཀྱི་རེ་བ།ཕ་མའི་རེ་བ།དགེ་རྒན་ཀྱི་རེ་བ།
འདོར་ན་རེ་བ་ཡོད་ཚད་ཁྱོད་ལ་བཅོལ་ཡོད་པས།ཁྱོད་ཀྱིས་ཁོ་ཚོའི་རེ་བའི་སྟེང་གི་འབབ་ཆུ་དེ་ཇི་ལྟར་སྒྲུབ་རྒྱུ་ཡིན།
ངས་དགེ་རྒན་དམ་པའི་ཁ་ཉན།དྲིན་ཅན་ཕ་མའི་བཀའ་བརྩིས་ནས།
བོད་ཡིག་ཀ་ཁ་ག་ང་དང་དབྱིན་ཡིག་a b c d རྒྱ་ཡིག་a o e ལ་སོགས་པའི།
འཛམ་གླིང་གི་སྐད་རིགས་འདྲ་མིན།differend of world language
世界各种语言
ལོ་དང་ཟླ་བ་ཞག་དང་ཉི་མ་ཐ་ན་དུས་ཚོད་དང་སྐར་ཆ་ཆུད་ཟོས་སུ་མ་སོང་བར།སེམས་ལ་བདེ་སྐྱིད་ཀྱིས་གང་།ངོ་ལ་འཛུམ་མདངས་ཀྱིས་གང་ནས་དུས་རབས་གསར་བའི་ཤེས་རིག་ལ་ཉིན་མཚན་གཏོལ་མེད་དང་འབད་བརྩོན་སློད་མེད་བྱས་ནས་ཕ་མ་དང་སློབ་དཔོན་ཀྱི་རེ་བ་ཉག་གཅིག་དེ་སྒྲུབ་ཐུབ་པར་བྱེད་རྒྱུ་ཡིན།
༣༼གངས་ཕྲུག་ཚོ།
སྐད་རིགས་མང་པོ་ཤེས་ན་བཟང་མོད་ཀྱང་།རང་གི་ཕ་སྐད་བརྗེད་ན་ངོ་རེ་ཚ་རེད
མེས་དབོན་གོང་མ་རྣམས་ཀྱི་བཀའ་དྲིན་ལས།བོད་ཡིག་འདི་གསར་གཏོད་བྱས།
ཤེས་རིག་གི་སྒྲོན་མེ་སྤར།མ་རིག་གི་མུན་པ་སེལ།ད་ལྟ་ང་ཚོའི་ལག་ནས་ཆད་སོང་ན།ང་ཚོས་ངོ་ཚ་རེད།
བོད་སྐད་ནི་གཞན་ལ་ཡོད་ན་སྨོན་དགོས་པ་དང།རང་ལ་ཡོད་ན་ངོམ་དགོས་པའི་ཁྱད་ནོར་ཕུན་སུམ་ཚོགས་པ་ཞིག་ཡིན་པ་སྨོས་མ་དགོས།
ཕྱི་ནང་ཀྱི་མི་རིགས་འདྲ་མིན།ཕྱི་རྒྱལ་ཀྱི་ཡུལ་གྲུ་ཁག་དང།
མཐོ་སློབ་ཀྱི་ན་གཞོན་སོ་སོས།དེང་དུས་ཀྱི་སློབ་མ་མོང་པོས།
དཀར་ནག་སེར་གསུམ་ཀྱི་མི་ཚོགས་འབུམ་ཕྲག་མོང་པོས་ང་ཚོའི་ཕ་མའི་ཡང་མེས་ནས་བཞག་པའི་ཕ་སྐད་གཙང་མ་འདི་ལ་ཉི་མཚན་གཏོལ་མེད་དང་འབད་བརྩོན་སློད་མེད་བྱེད་ཀྱིན་ཡོད་པ་མ་ཟད།རྒྱལ་ཁབ་ཕྱི་ནང་མོང་པོས་མཐོང་ཆེན་བྱེད་ཡུལ།
མི་རིགས་དཀར་ནག་མོང་པོས་སློབ་སྦྱོང་བྱེད་ས་ཞིག་ཆགས་ཡོད་པ་ཚང་མས་ཤེས་རྒྱུ་རེད།
ཕ་ཆོས་རྣམ་ལྕགས་ཀྱི་རལ་གྲི།རིག་གཞུང་གསེར་ནག་གི་ཕ་བོང་འདི་ནི།
གནས་སྲིད་པ་ཆགས་པའི་གངས་རྒན་ཡིན།ཕ་ཨ་མྱེ་རང་གི་རིགས་གཞུང་ཡིན།
ང་ཚོ་བོད་པ་ཚང་གིས་བཅར་ཆེ་ན་མིག་གིས་རྫི་མ་མི་རིག་ཞེས་པའི་དཔེ་ལྟར།
དེ་ལ་མཐོང་ཆུང་བྱེད་ཉན་ཨེ་རེད།
བྱེད་ཉན་མ་རེད།
ཕ་སྐད་གཙང་མ་བཤད་ན་ངོ་ཚ་ཡིན་སྣང་ཤར་ཉན་ཨེ་རེད།
ཤར་ཉན་མ་རེད།
སུམ་དག་རྟགས་གསུམ་སྦྱངས་ན་འདུན་ལམ་མེད་སྣང་ཤར་ཉན་ཨེ་རེད།
ཤར་ཉན་མ་རེད།
ཀུན་གཟིགས་པཎ་ཆེན་རིན་པོ་ཆེ་མཆོག་གི་གསུང་གི་བདུད་རྩི་ལས།
ཁྱེད་ཚོས་བོད་སྐད་བཤད་པར་ངོ་ཚ་ན་མ་བཤད་ན་ཆོག
བོད་ལྭ་གྱོན་པར་ངོ་ཚ་ན་དེ་ཡང་མ་གྱོན་ན་ཆོགཡིན་ཡང་ཁྱེད་ཚོའི་ཤ་དང་རུས་པ་ཇི་ལྟར་བྱེད་ཀྱི་ཡིན་གསུངས་ནང་བཞིན།
ང་ཚོས་ཚིག་ལ་འབད་བརྩོན་བྱེད།དོན་ལ་སྙིང་སྟོབས་བསྐྱེད་ནས།
ལྕེ་དམར་བོའི་སྟེང་གི་ཕོ་ཚིག་དེ།སེམས་གངས་དཀར་རྒྱུད་དུ་གསལ་སེ་ཡོད།
ཐམས་ཅད་གཅིག་མཐུན་གྱི་བསམ་པ་བྱུང་ན།མི་རྗེས་མི་ཡིས་འཛིན་པར་བྱེད་ཞེས་པའི་དཔེ་ལྟར།
མ་འོང་ཁ་བ་ཅན་གྱི་ཡུལ་གྲུ་ལ།
སྔར་མེད་ཁུ་བྱུག་སྔོན་མོའི་གསུང་སྙན་ཞིག་སྒྲོག་པའི་ལས་སྤོབས་པ་ཨེ་ཡོད།ཡོད།ཡོད།
སྔར་མེད་དཔྱིད་དཔལ་བསུ་བའི་འབྲུག་སྒྲ་ཞིག་སྒྲོག་པའི་སྤོབས་པ་ཨེ་ཡོད།ཡོད།ཡོད།
སྔར་མེད་དུས་རབས་གསར་བའི་ཅོང་བརྡ་ཞིག་སྒྲོག་པའི་སྤོབས་པ་ཨེ་ཡོད།ཡོད།ཡོད།